ᖃᓂᒃᑯᑦ ᐋᓐᓂᐊᖅ ᑲᒡᒍᑎ

ᖃᓂᒃᑯᑦ ᑲᒡᒍᑏᑦ ᑕᐃᒫᑦᑎᐊᖑᙱᑦᑐᑦ ᑭᓱᑐᐃᓐᓇᐃᑦ ᖃᓂᕐᒥ ᐱᕈᖅᐸᓪᓕᐊᑎᓪᓗᒋᑦ ᐊᒻᒪᓗ ᑖᒃᑯᐊ ᐃᔭᕈᕙᐅᕙᐃᑦ ᓯᐊᕐᒪᑎᓪᓗᒋᑦ ᖃᓂᕐᒥ, ᓲᕐᓗᒃ ᐅᑯᓄᖓ:​

  • ᖃᖅᑐᒃ
  • ᐅᖃᖅ
  • ᐃᑭᖅ
  • ᖃᖅᑐᑉ ᐃᓗᐊᒍᑦ ᐊᒻᒪᓗ ᐅᓗᐊᑉ ᐃᓗᐊᒍᑦ
  • ᖃᓂᑉ ᐊᓪᓕᖓᓂ
  • ᕿᓚᒃ
  • ᑐᖅᑯᔮᒃ
  • ᓄᕙᓕᐅᕈᑏᑦ
  • ᑭᒍᑎᑉ ᐃᓱᑦᑎᖅᐹᖓᑕ ᑐᓄᐊᒍᑦ.

ᐊᑦᑕᕐᓇᕈᑎᒋᓗᐊᖅᑕᖏᑦ ᐊᒻᒪᓗ ᐋᓐᓂᐊᖅᑖᖅᑕᐃᓕᒪᓂᖅ ᑲᒡᒍᑎᒥᒃ

  • ᑕᕝᕚᑲᓕᒃᑐᖃᑦᑕᕐᓂᖅ ᐊᒻᒪᓗ ᐃᒥᓗᐊᖃᑦᑕᕐᓂᖅ.  ᓯᒡᒐᓕᐊᖅᑐᓲᑦ ᐅᕝᕙᓘᓐᓃᑦ ᑕᒧᐊᑦᑐᐊᓲᑦ ᑕᕝᕚᑲᓕᖕᓂᑦ ᐃᒥᐊᓗᖃᑦᑕᓯᓐᓈᖅᑐᑎᑦ ᖃᓂᒃᑯᑦ ᐋᓐᓂᐊᖅᑖᕐᓂᖅᓴᐅᓲᑦ ᑲᒡᒍᑎᓂᑦ. 
  • ᑕᕝᕚᑲᓕᑦᑐᖃᑦᑕᕈᓐᓃᖅᑐᓂ ᐊᒻᒪᓗ ᐃᒥᐊᓗᖃᑦᑕᕈᓐᓃᖅᑐᓂ ᐊᑦᑕᕐᓇᕈᓐᓃᑎᑦᑎᓲᖅ ᐊᒥᓱᓂᑦ ᐊᕐᕌᒍᓂᑦ ᑕᐃᒪᓐᓇᐃᑦᑐᑐᖃᑦᑕᓚᐅᕋᓗᐊᖅᑎᓪᓗᑎᑦ.  ᐊᑐᕋᒃᓴᖅᑕᖃᐅᖅᐳᖅ ᐃᑲᔫᑎᓂᑦ ᓄᖅᑲᕐᓗᑎᑦ ᑕᕝᕚᑲᓕᒃᑐᓂᕐᒥᒃ.  ᑕᕝᕚᑲᒦᑦᑐᖅ ᐅᐃᕆᖕᓇᖅᑐᓂᑦ ᐊᓯᖏᓐᓂᒃ ᐊᑐᖔᕐᓗᓂ, ᓲᕐᓗᒃ ᐅᕕᓂᒧᑦ ᓂᐱᑎᒐᐃᑦ ᐊᒻᒪᓗ ᖃᐅᓐᓇᐃᑦ, ᓄᖅᑲᓂᖅᓴᐅᒍᓐᓇᕋᔭᖅᑐᑎᑦ.  ᐃᑲᔪᖅᑕᐅᖁᓪᓗᑎᑦ, ᐅᐸᓪᓗᒍ ᐋᓐᓂᐊᕐᕕᒃ, ᖃᕋᓴᐅᔭᒃᑯᓪᓘᓐᓃᑦ ᑎᑎᕋᕐᓗᑎᑦ ᐅᕗᖓ [email protected] ᐅᕝᕙᓘᓐᓃᑦ ᐅᖄᓚᓗᑎᑦ ᐅᕗᖓ 1-866-368-7848.
  • ᓯᕿᓂᑉ ᖃᐅᒪᓂᖓᓃᑯᑖᖃᑦᑕᕈᑎᑦ ᖃᖅᑑᒃᑭᒃ.  ᐊᑐᖃᑦᑕᕐᓗᑎᑦ ᖃᓂᖅᓯᐅᑎᒥᒃ ᓴᐳᔾᔨᓲᕐᒥᒃ ᓯᕿᓂᑉ ᖃᐅᔨᒪᓂᖓᓂᒃ ᐋᓐᓂᕈᑎᒋᔭᐅᔪᓐᓇᖅᑐᒥᒃ ᖃᖅᑑᒃᑭᒃ ᑲᒪᒋᑦᑎᐊᕐᓗᒋᒃ.
  • ᐅᑭᐅᖃᓗᐊᖅᑐᑦ − ᖃᓂᒃᑯᑦ ᐋᓐᓂᐊᖅᑖᓂᖅᓴᐅᓲᑦ ᐃᓄᐃᑦ ᐅᑭᐅᓖᑦ ᐅᖓᑖᓂ 40.
  • ᐊᕐᓇᐅᒍᓂ ᐊᖑᑕᐅᒍᓂ − ᐊᖑᑏᑦ ᖃᓂᒃᑯᑦ ᐋᓐᓂᐊᖅᑖᒃᑲᔪᓐᓂᖅᓴᐅᔪᑦ ᐊᕐᓇᐃᑦ ᓴᓂᐊᓂ.
  • ᓂᕆᖃᑦᑕᕐᓂᖅ − ᓂᕆᑦᑎᐊᓲᑦ ᓲᕐᓗᒃ ᓰᕐᓇᖅᑐᓂᑦ ᐱᕈᖅᑐᒥᓂᕐᓂᑦ ᐊᒻᒪᓗ ᐱᕈᖅᑐᒥᓂᕐᓂᑦ ᓴᐳᔾᔨᔾᔪᑎᖃᓲᑦ ᐊᒻᒪᓗ ᐅᑉᐱᕆᔭᐅᓪᓗᓂ ᖃᓂᒃᑯᑦ ᐋᓐᓂᐊᖅᑖᖅᑕᐃᓕᑎᑦᑎᒍᑕᐅᓲᖑᓪᓗᓂ ᑲᒡᒍᑎᓂᑦ.  
  • ᖃᓂᕐᒥᒃ ᐊᑐᖅᑐᑦ ᑯᔭᒃᑐᑎᑦ − ᖃᓂᒃᑯᑦ ᐃᓪᓕᐊᓪᓗ ᐹᖓᒍᑦ ᐋᓐᓂᐊᓕᕈᑕᐅᓲᑦ ᐅᙳᑖᕐᓇᑐᓪᓗ ᐊᐃᑦᑑᑕᐅᓲᖑᕗᑦ ᖃᓂᒃᑯᑦ ᐊᑐᖅᑐᑎᑦ ᑯᔭᑦᑐᖃᖅᑎᓪᓗᒍ ᐊᒻᒪᓗ ᐊᒥᓱᕈᖅᐸᓪᓕᐊᑐᐃᓐᓇᖅᑐᑦ ᖃᓂᒃᑯᑦ ᐋᓐᓂᐊᖅᑖᕈᑎᒋᔭᐅᓲᖑᓪᓗᓂ. 

ᖃᐅᔨᔭᒃᓴᐅᔾᔪᑎᖏᑦ ᐊᒻᒪᓗ ᑎᒥᒥ ᖃᓄᐃᒍᑎᖏᑦ ᐋᓐᓂᐊᖃᖅᑐᑎᑦ

ᐅᑯᓂᖓ ᖃᐅᔨᔭᒃᓴᐅᔪᓂᑦ ᑎᒥᒥ ᖃᓄᐃᒍᑎᖏᑦ ᐋᓐᓂᐊᖃᕈᑎᖏᑦ ᓴᖅᑭᔮᖅᑐᓂᑦ ᖃᐅᔨᒍᕕᑦ ᑕᑯᓂᐊᕐᓗᒍ ᑭᒍᑎᓕᕆᔩᑦ ᐅᕝᕙᓘᓐᓃᑦ ᐋᓐᓂᐊᕕᒻᒥ ᐋᓐᓂᐊᓯᐅᖅᑏᑦ:

  • ᖃᖅᑐᒃᑯᑦ ᖃᓂᒃᑯᓘᓐᓃᑦ ᖃᓂᕐᓗᒃᑯᓂ ᒪᒥᒍᓐᓇᙱᑦᑐᓂ ᒪᕐᕉᒃ ᐱᓇᓱᐊᕈᓰᒃ ᐃᓗᐊᓂ
  • ᖃᑦᑎᑦᑐᑲᓪᓚᒃ ᖃᖅᑐᒥ, ᖃᓂᕐᒥ ᐃᒡᒋᐊᕐᒥ
  • ᖃᑯᖅᑕᖅ ᐊᐅᐸᖅᑐᓘᓐᓃᑦ ᖃᓂᑉ ᐃᑭᖓᓂ, ᐅᖃᕐᒥ ᐅᕝᕙᓘᓐᓃᑦ ᖃᓂᑉ ᐃᓗᐊᓂ
  • ᐊᐅᓈᖃᑦᑕᖅᑐᑦ ᑕᐃᒪᐃᑉᐸᖏᒃᑲᓗᐊᖅᑎᓪᓗᒍ, ᐋᓐᓂᐊᔪᑦ ᐅᕝᕙᓘᓐᓃᑦ ᐃᑉᐱᓂᐊᙱᓐᓂᖃᖅᑐᖅ ᖃᓂᕐᒥ
  • ᑐᖅᑯᔮᕐᓗᖃᑦᑕᐃᓐᓇᖅᑐᖅ ᐅᕝᕙᓘᓐᓃᑦ ᐃᒡᒋᐊᕐᒥ ᐲᖅᓯᒐᓱᐊᕆᐊᖃᐃᓐᓇᑐᕐᔫᔮᖅᑐᖅ ᑭᓱᑕᖃᖅᑐᕐᔫᔮᕐᓂᖓᓄᑦ
  • ᑕᒧᐊᒡᒐᖅᑐᑦ ᐋᓐᓂᐸᑦᑐᓘᓐᓃᑦ ᑕᒧᐊᓪᓗᑎᑦ ᐄᓯᓪᓗᑎᓪᓘᓐᓃᑦ
  • ᐳᓪᓕᖅᑐᑦ ᐊᓪᓕᕈᖏᑦ ᑭᒍᑎᙳᐊᑦ ᐃᕐᕈᑎᑦᑎᐊᕈᓐᓃᖅᑐᑎᑦ ᐊᑲᐅᒍᓐᓃᖅᑐᑎᓪᓘᓐᓃᑦ
  • ᐊᓯᔾᔨᖅᑐᖅ ᓂᐲᑦ
  • ᓯᐅᓯᕇᓐᓇᓕᕐᓗᑎᑦ.

ᖃᓂᒃᑯᑦ ᐋᓐᓂᐊᖃᕐᒪᖔᖅ ᑲᒡᒍᑎᒥᒃ ᓇᒻᒥᓂᖅ ᖃᐅᔨᓴᕐᓂᖅ

ᐱᖓᓲᔪᖅᑐᑦ ᐊᑕᐅᓯᕐᓗ ᐱᔭᕆᐊᑭᑦᑐᓂᑦ ᖃᓄᐃᓕᐅᕈᑎᖃᕈᓐᓇᕋᕕᑦ ᖃᓃᑦ ᓇᒻᒥᓂᖅ ᖃᐅᔨᓴᕐᓗᒍ.  ᑕᖅᑭᑕᒫᑦ ᓇᒻᒥᓂᖅ ᖃᐅᔨᓴᖃᑦᑕᕈᕕᑦ ᖃᐅᔨᓴᕋᐃᓐᓂᖅᓴᐅᒍᓐᓇᕋᔭᖅᑐᑎᑦ ᖃᓂᒃᑯᑦ ᐋᓐᓂᐊᖃᕐᒪᖔᖅᐱᑦ.

1.  ᓂᐊᖁᖅ ᐊᒻᒪᓗ ᖁᖓᓯᖅ
ᖃᑦᑎᑦᑐᑕᖃᕈᓂ, ᖃᑦᑎᑦᑐᑲᓪᓚᒃᑕᖃᕈᓂ, ᐅᕝᕙᓘᓐᓃᑦ ᐳᕕᑦᑐᖃᕈᓂ ᑮᓇᖅᐱᑦ ᐃᓪᓗᐊᓃᑦᑐᖅ ᓘᒃᑖᕕᑦ ᑭᒍᓐᓂᐊᖅᑎᕕᓪᓘᓐᓃᑦ ᑕᑯᓂᐊᕆᐊᓕᖓ.

2. ᑮᓇᖅ
ᑕᑯᓗᒍ ᐅᕕᓂᖓ ᑮᓇᖅᐱᑦ.  ᖃᐅᔨᕖᑦ ᐊᓯᔾᔨᖅᑐᓂᑦ ᐊᒥᐊᖏᓐᓂᑦ, ᐊᒥᑭᑦᑐᓂᑦ, ᑕᖅᓴᓂᑦ ᐅᕝᕙᓘᓐᓃᑦ ᐱᕈᖅᑐᖅᑕᖃᕈᓂ?

3. ᖁᖓᓯᖅ
ᓇᕿᑎᖃᑦᑕᕐᓗᒍ ᓴᓂᕋᖏᒃ ᓯᕗᐊᓗ ᖁᖓᓯᑉ.  ᐋᓐᓂᓇᒐᓚᒃᐹ ᐅᕝᕙᓘᓐᓃᑦ ᖃᑦᑎᑦᑐᑕᖃᖅᐹ?

4. ᖃᖅᑑᒃ
ᓄᓱᓪᓗᒍ ᑲᓪᓗᐃᑦ ᐊᒻᒪᓗ ᑕᑯᓂᐊᕐᓗᑎᑦ ᐃᓗᐊᓂ ᖃᓂᕐᓗᙱᒃᑲᓗᐊᕐᒪᖔᖅ ᐊᓯᔾᔨᖅᓯᒪᙱᒃᑲᓗᐊᕐᒪᖔᕐᓗ ᐊᒥᐊᖓ.  ᑭᖑᓪᓕᕐᒥ ᑯᑉᓗᐃᑦ ᐊᑐᕐᓗᒍ ᐊᒻᒪᓗ ᑎᑮᑦ ᖃᐅᔨᓴᕐᓗᑎᑦ ᖃᖅᑐᖕᓂ ᖃᑦᑎᑦᑐᓂᑦ, ᖃᑦᑎᑦᑐᑲᓪᓚᓐᓂᒃ, ᐅᕝᕙᓘᓐᓃᑦ ᐊᓯᔾᔨᖅᓯᒪᔪᖃᙱᒃᑲᓗᐊᕐᒪᖔᖅ ᖃᓄᐃᑦᑑᓂᖓᓂᒃ ᐊᑦᑐᖅᑐᒍ.  ᑕᐃᒪᓐᓇᐃᓕᐅᕐᒥᓗᑎᑦ ᑲᒃᑭᕕᐊᕐᓄᑦ.

5. ᐅᓗᐊᒃ
ᕿᓂᕐᓗᑎᑦ ᐊᐅᐸᖅᑐᓂᑦ, ᖃᑯᖅᑕᓂᑦ, ᐅᕝᕙᓘᓐᓃᑦ ᐊᒥᐊᓕᖕᓂᑦ.  ᑭᖑᓪᓕᕐᒥ, ᕿᓂᕐᓗᑎᑦ ᖃᑦᑎᑦᑐᓂᑦ ᐅᕝᕙᓘᓐᓃᑦ ᐋᓐᓂᓇᕐᒪᖔᖅ ᖃᐅᔨᓴᕐᓗᑎᑦ, ᓂᑲᒋᓗᒍ ᑎᑭᕐᓄᑦ ᑯᑉᓗᓄᓪᓗ ᖃᐅᔨᓴᕐᓗᒍ ᐅᓗᐊᑦ.

6. ᖃᓂᑉ ᕿᓚᖓ
ᐊᑐᕐᓗᑎᑦ ᖃᓂᕐᒧᑦ ᑕᕐᕋᖅᑑᑎᒥᑦ ᐅᕝᕙᓘᓐᓃᑦ ᐋᕐᓗᕐᓗᑎᑦ ᑕᑯᓇᓱᐊᕐᓗᑎᑦ ᖃᑦᑎᑦᑐᖅᑕᖃᕐᒪᖔᖅ, ᖃᓂᕐᓗᓂᓘᓐᓃᑦ, ᐅᕝᕙᓘᓐᓃᑦ ᐊᒥᐊᖅᑕᖃᙱᒃᑲᓗᐊᕐᒪᖔᖅ ᖃᓂᕕᑦ ᕿᓚᖓᓂ.

7. ᖃᓂᐅᑉ ᐊᓪᓕᖓᓃᑦᑐᖅ ᐊᒻᒪᓗ ᐅᖃᖅ

ᐅᖃᐃᑦ ᓴᖅᑭᑎᓪᓗᒍ, ᖁᓛ ᑕᑯᓂᐊᕐᓗᒍ.  ᐊᑐᕐᓗᑎᑦ ᒪᑦᑐᑎᒥᒃ ᓂᐱᒍᓐᓇᖏᑦᑐᒥᒃ ᑲᒃᑭᐅᑎᒃᓴᒥᓪᓘᓐᓃᑦ, ᑎᒍᓗᒍ ᐅᖃᐃᑦ ᓯᕗᒧᐊᑦᑎᓪᓗᒍ ᑕᑯᓂᐊᕋᕕᒋᒃ ᓴᓂᕋᖏᑦ, ᐃᓪᓗᐊᓗ.  ᐅᖃᖅᐱᑦ ᐊᑖ ᑕᑯᓂᐊᕐᒥᓗᒍ ᐊᒻᒪᓗ ᐊᓪᓕᖓ ᖃᓂᖅᐱᑦ ᐅᖃᐃᑦ ᕿᓚᖕᓅᖓᑎᓪᓗᒍ.  ᑕᑯᓂᐊᕐᓗᑎᑦ ᐳᓪᓕᖅᓯᒪᔪᖃᕈᓂ ᐅᕝᕙᓘᓐᓃᑦ ᐊᒥᐊᖓ ᐊᓯᔾᔨᖅᓯᒪᒍᓂ.